Posts

Showing posts with the label shiva

ಮಾತಾಡು ಓ ಶಂಕರ

Image
ಮಾತು ಮರೆತೆ ಏಕೆ ಶಂಕರ ಬಕುತ ಮನದಿ ನಟನವಾಡಿ ನಿರಂತರ ||ಪ|| ಗಿರಿಜೆ ಕೂಡಿ ಸರಸವಾಡಿ ತಿರುಗಿ ಕುಳಿತು ತಪವ ಮಾಡಿ ಶಿವನೆ – ಮಾತು ಮರೆತೆ ||೧|| ಗಂಗೆ ಜಲದಲಿ ಮಿಂದು ಬಂದು ಚೆಂದದಿಂದಲಿ ರಮೆಯ ಕಂಡು ಹರನೆ – ಮಾತು ಮರೆತೆ ||೨|| ಶೂಲ ಸೆಳೆದು ಬಾಲ ಗಣಪನ ಶಿರವ ತರಿಯೆ ನೋವಿನಿಂದ – ಮಾತು ಮರೆತೆ ||೩|| ಶೂರ ಶರವಣ ಅರಿಯ ಬಡಿದು ಗೆಲುವ ಬೀರಿ ಹರುಷದಿಂದ – ಮಾತು ಮರೆತೆ ||೪|| ಮಸಣ ಬಸುಮ ಹಣೆಗೆ ಇರಿಸಿ ರುದಿರ ನಯನ ಮಾಲೆ ಧರಿಸಿ – ಮಾತು ಮರೆತೆ ||೫|| ನಂದಿ ವಾಹನ ಏರಿ ಕುಳಿತು ಲಯದ ಕೆಲಸಕೆ ಲೋಕ ತಿರುಗಿ – ಮಾತು ಮರೆತೆ ||೬|| ಹರಿ ತಾನೊಂದೆನುತ ಶೇಷಶಯನನಲಿ ಲೀನ ತಾನಾಗಿ ಬಿಂಕದಲಿ ಹರ – ಮಾತು ಮರೆತೆ ||೭|| ಹವನದುರಿಯಲಿ ದಹಿಸಿಕೊಂಡ ಸತಿಯ ನೆನೆದು ಕೂಗಿ ಕರೆದು – ಮಾತು ಮರೆತೆ ||೮|| ಮದನ ಬಾಣ ಎದೆಗೆ ಇರಿಯೆ ಕೆಂಡ ನಯನ ಬೀರಿ ಕೊಂದು – ಮಾತು ಮರೆತೆ ||೯|| ಹಿಮದ ಗಿರಿಯ ತುದಿಯಲೊಂದು ಮನೆಯ ಮಾಡಿ ಶೂಲಪಾಣಿ – ಮಾತು ಮರೆತೆ ||೧೦|| ಕೊರಳ ಮಾಲೆಗೆ ಹಾವ ಧರಿಸಿ ಶಶಿಯ ಕರೆದು ಶಿರದಲಿರಿಸಿ – ಮಾತು ಮರೆತೆ ||೧೧|| ಬೊಗಸೆ ಹಿಡಿದು ವಿಷವ ಕುಡಿದು ಜಗದ ಅಳಿವು ತಡೆದು ಹರನೆ – ಮಾತು ಮರೆತೆ ||೧೨|| ಪಾಪ ಕಳೆದು ಲೋಕ ಬೆಳಗಿ ಲಿಂಗವಾಗಿ ಜಂಭದಿಂದ – ಮಾತು ಮರೆತೆ ||೧೩|| ಗಾನ ಕೇಳಿ ಪದಪದಕೆ ನಲಿದು  ಒಲುಮೆಯಿಂದ ಪಯಣಿಗನ ಹರಸಿ – ಮಾತು ಮರೆತೆ ||೧೪|| - ಪ್ರಕಾಶ ಪಯಣಿಗ